خواجہ سفر

حضرت خواجہ سفر فنِ تعمیر میں ماہر تھے، آپ خداوند خاں رومی کے نام سے مشہور ہیں، پہلے احمد آباد میں رہتے تھے، جب سلطان محمود شاہ دویم نے سورت میں ایک قلعہ بنانے کا خیال کیا تو اس کی نگاہ آپ پر پڑی، اس نے احمدآباد سے آپ کو بلایا اور قلعہ کی تعمیر کا کام آپ کے سپرد کیا، پرتگیز یعنی پرتگال کے لوگوں نے مزاحمت کی، وہ سورت کے بندرگاہ کو اپنے قبضہ میں رکھنا چاہتے تھے، سمندر پر اقتدار ہونے کے یہ معنی ہوئے کہ سمندر کے ذریعہ آمد و رفت اور تجارت ان کے ہاتھ میں رہے، غرض آپ بحیثیتِ قلعہ دار کے سورت میں رہتے رہے اور پرتگیز سے ٹکر لیتے رہے، آخر تابکے شہید ہوئے۔

آپ کے وفادار اور جانثار نوکر مرجان شامی نے آپ کو موضع ٹنڈی میں دفن کیا، یہ وہ جگہ ہے جہاں دوسرا قلعہ بنانے کا خیال تھا، قلعہ تو نہ بن سکا لیکن آپ کا مزار وہاں بن گیا۔