mujhe na chheD ai nasim-e-taza ki mahw-e-ru-e-jamal hun main

mujhe na chheḌ ai nasīm-e-tāza ki mahv-e-rū-e-jamāl huuñ maiñ

qatīl-e-husn-e-chaman nahīñ huuñ asīr-e-dām-e-ḳhayāl huuñ maiñ

mujhī meñ muzmar hai soz-e-ulfat nihāñ mujhī meñ hai husn-e-fitrat

mujhe miTā.egā kyā zamāna ki mazhar-e-lā-zavāl huuñ maiñ

na jaane kis kī talāsh mujh ko uḌā ke laa.ī hai sū-e-hastī

junūñ meñ gardish-e-bagolā huuñ maiñ taḌap meñ barq-e-kamāl huuñ maiñ

mirī haqīqat na pūchh nāseh ishāra kaafī hai sirf itnā

paḌe hai jis kā ye partav-e-ruḳh usī kā 'aks-e-jamāl huuñ maiñ

mirā junūn-e-vafā musalsal mirī hadīs-e-alam mukammal

amīn-e-roz-e-azal huuñ 'āqil' ġharīq-e-shauq-e-visāl huuñ maiñ

mujhe na chheD ai nasim-e-taza ki mahw-e-ru-e-jamal hun main

qatil-e-husn-e-chaman nahin hun asir-e-dam-e-KHayal hun main

mujhi mein muzmar hai soz-e-ulfat nihan mujhi mein hai husn-e-fitrat

mujhe miTaega kya zamana ki mazhar-e-la-zawal hun main

na jaane kis ki talash mujh ko uDa ke lai hai su-e-hasti

junun mein gardish-e-bagola hun main taDap mein barq-e-kamal hun main

meri haqiqat na puchh naseh ishaara kafi hai sirf itna

paDe hai jis ka ye partaw-e-ruKH usi ka 'aks-e-jamal hun main

mera junun-e-wafa musalsal meri hadis-e-alam mukammal

amin-e-roz-e-azal hun 'aqil' ghariq-e-shauq-e-visal hun main