KHud ka parda hai to KHud KHud ko zara dekh to le

ḳhud kā parda hai to ḳhud ḳhud ko zarā dekh to le

ḳhud ke parde meñ tire ḳhud hai ḳhudā dekh to le

ḳhud se jo duur rahe haq se bhī vo duur rahe

hai vo ḳhud gum-shuda is baat ko pā dekh to le

kuchh nahīñ hai bhī to sab kuchh hai tū hī baat to sun

aap se aap hī tū ḳhud hai judā dekh to le

hai ḳhudā ḳhud meñ tire aur tū ḳhudā meñ gum hai

ai vo mad.hosh zarā hosh meñ aa dekh to le

aap apne ko jo jaanā vo ḳhudā ko jaanā

shah-e-laulāk kā irshād hai kyā dekh to le

nahnū aqrab kā agar bhed samajhnā ho tujhe

apnī shah-e-rag kī taraf dhyān lagā dekh to le

kar riyāzat na tū aur bhūkoñ na mar ḳhud ko samajh

rāz-e-fī-anfosekum piir se pā dekh to le

gar ḳhudā se tujhe milnā hai to ḳhud se mil le

aap apne ko zarā aañkh uThā dekh to le

naqd-e-vaqt aaj hai dīdār ḳhudā kā 'ġhausī'

apnī sūrat ko tū ā.īna banā dekh to le

KHud ka parda hai to KHud KHud ko zara dekh to le

KHud ke parde mein tere KHud hai KHuda dekh to le

KHud se jo dur rahe haq se bhi wo dur rahe

hai wo KHud gum-shuda is baat ko pa dekh to le

kuchh nahin hai bhi to sab kuchh hai tu hi baat to sun

aap se aap hi tu KHud hai juda dekh to le

hai KHuda KHud mein tere aur tu KHuda mein gum hai

ai wo madhosh zara hosh mein aa dekh to le

aap apne ko jo jaana wo KHuda ko jaana

shah-e-laulak ka irshad hai kya dekh to le

nahnu aqrab ka agar bhed samajhna ho tujhe

apni shah-e-rag ki taraf dhyan laga dekh to le

kar riyazat na tu aur bhukon na mar KHud ko samajh

raaz-e-fi-anfosekum pir se pa dekh to le

gar KHuda se tujhe milna hai to KHud se mil le

aap apne ko zara aankh uTha dekh to le

naqd-e-waqt aaj hai didar KHuda ka 'ghausi'

apni surat ko tu aaina bana dekh to le