kaba-o-kalisa mein wo kahte hain kya hai sab sajdon ki ja hai

ka'ba-o-kalīsā meñ vo kahte haiñ kyā hai sab sajdoñ kī jā hai

un ko to mere dard bhare dil meñ mazā hai yaañ rahnā ravā hai

jab un se bayāñ kījiye taklīf-e-judā.ī allāh re safā.ī

farmāte haiñ ye dil ke lagāne kī sazā hai chāhat kā mazā hai

rasm-e-qafas-o-qaid se vāqif nahīñ aslan sayyād sikhānā

ye tā.ir-e-dil taaza giraftār-e-balā hai nāzoñ kā palā hai

par kāla-e-ātish hai mirī āh-e-sharar-bār phūñkā mirā ghar-bār

merā na mirī ḳhirman-e-hastī kā patā hai bas nām-e-ḳhudā hai

'bedam' vahāñ ḳhat kī na payāmī kī rasā.ī kyūñkar ho sunā.ī

be-kār haiñ naale ye abas āh-o-bukā hai ab honā hī kyā hai

ka'ba-o-kalisa mein wo kahte hain kya hai sab sajdon ki ja hai

un ko to mere dard bhare dil mein maza hai yan rahna rawa hai

jab un se bayan kijiye taklif-e-judai allah re safai

farmate hain ye dil ke lagane ki saza hai chahat ka maza hai

rasm-e-qafas-o-qaid se waqif nahin aslan sayyaad sikhana

ye tair-e-dil taza giraftar-e-bala hai nazon ka pala hai

par kala-e-atish hai meri aah-e-sharar-bar phunka mera ghar-bar

mera na meri KHirman-e-hasti ka pata hai bas nam-e-KHuda hai

'bedam' wahan KHat ki na payami ki rasai kyunkar ho sunai

be-kar hain nale ye abas aah-o-buka hai ab hona hi kya hai