محبت یوں تو کہنے کو بلائے ناگہانی ہے

محبت یوں تو کہنے کو بلائے ناگہانی ہے

محبت ہی سے لیکن آدمی کی زندگانی ہے

تمہارے دل میں گنجائش اگر ہو تو جگہ دے دو

مجھے اپنے دل مرحوم کی تربت بنانی ہے

جفا و جور کیوں مجھ کو نہ راس آئیں محبت میں

جفا و جور کے پردے میں پنہاں مہربانی ہے

ادھر کہتا ہے ترک بادہ نوشی کے لئے زاہد

ادھر ساقی ہے ساغر ہے شراب ارغوانی ہے

عزیزؔ وارثی ہر شعر اک طوفان ہے اس کا

جناب نوحؔ کی دن رات جس پر مہربانی ہے