نہ کام آئے جو دامن کے اشک خوں کیا ہے

نہ کام آئے جو دامن کے اشک خوں کیا ہے

جو کام آئے نہ آنکھوں کے وہ لہو کیا ہے

بنا ہے وعدۂ فردا سے ان کے تار کفن

سفید ریش کا میری ہر ایک مو کیا ہے

نہ رنگ لائے نہ بو دے اگر کریں پامال

میں کچھ نہیں ہوں میرا خون آرزو کیا ہے

جو توڑ ہے عوض مے ذرا سا پانی دے

ہمارے دل کا پھپھولا ہے یہ سبو کیا ہے

بجھے گی پیاس نہ میری اگر گلا رگڑوں

نہ آب جس میں ہو وہ خنجر عدو کیا ہے

جو نا شناس ہیں ان کو ریاضؔ ہو معلوم

غلام ساقیٔ کوثر کی آبرو کیا ہے