وہ رخ سے دور جو پردا حجاب کا کرتے

وہ رخ سے دور جو پردا حجاب کا کرتے

تو ان کے سامنے ہم بھی نماز ادا کرتے

بتوں کی یاد میں ہم یوں خدا خدا کرتے

کمال عشق جو ہوتا تو جانے کیا کرتے

مآل گمرہی شوق ارے معاذاللہ

جو تھک کے بیٹھ نہ جاتے تو اور کیا کرتے

کسی کی یاد میں دنیا اجاڑ لی اپنی

شب فراق کے صدقے میں اور کیا کرتے

نگاہ و دل ہوئے بے اختیار خضر خلاف

رہ وفا میں کسے اور رہنما کرتے

جگر گداز تھی اے شادؔ ضبط کی دنیا

ہم ایسی ہوش ربا وادیوں میں کیا کرتے