go ahl-e-wafa se wo sitamgar nahin milta

go ahl-e-vafā se vo sitamgar nahīñ miltā

ye shukr hai ġhairoñ se bhī aksar nahīñ miltā

ye ḳham nahīñ miltā hai ye jauhar nahīñ miltā

abrū se tumhāre koī ḳhanjar nahīñ miltā

ab baar hai sar dosh par ai shauq-e-shahādat

lillāh batā de vo sitam-gar nahīñ miltā

dil kyā hai jo us zulf se jā kar palaT aa.e

insān usī kūcha meñ kho kar nahīñ miltā

jab tak na mile vo to koī kyā use paa.e

hairat kī to ye baat hai mil kar nahīñ miltā

kyā kahte haiñ mumkin nahīñ allāh kā milnā

tum DhūñD ke dekho bhī to kyuuñ kar nahīñ miltā

haath aa.egā kis tarah se vo gauhar-e-yaktā

dariyā-e-mohabbat kā shanāvar nahīñ miltā

milte haiñ kahīñ kho.e hue raah talab ke

ham DhūñD rahe haiñ hameñ 'akbar' nahīñ miltā

go ahl-e-wafa se wo sitamgar nahin milta

ye shukr hai ghairon se bhi aksar nahin milta

ye KHam nahin milta hai ye jauhar nahin milta

abru se tumhaare koi KHanjar nahin milta

ab bar hai sar dosh par ai shauq-e-shahadat

lillah bata de wo sitam-gar nahin milta

dil kya hai jo us zulf se ja kar palaT aae

insan usi kucha mein kho kar nahin milta

jab tak na mile wo to koi kya use pae

hairat ki to ye baat hai mil kar nahin milta

kya kahte hain mumkin nahin allah ka milna

tum DhunD ke dekho bhi to kyun kar nahin milta

hath aaega kis tarah se wo gauhar-e-yakta

dariya-e-mohabbat ka shanawar nahin milta

milte hain kahin khoe hue rah talab ke

hum DhunD rahe hain hamein 'akbar' nahin milta