ہم سے سب کہتے ہیں تم اس سے ملے تو کیا ہوئے

ہم سے سب کہتے ہیں تم اس سے ملے تو کیا ہوئے

ہم یہ کہتے ہیں دوئی جاتی رہی یکتا ہوئے

ٹھیک زد پر طور تھا یہ تو اچٹتی چوٹ تھی

اور پھر اس پر بھی بے خود حضرت موسیٰ ہوئے

قطرے جب دریا میں گرتے ہیں تو ہوتا ہے یہ شور

دیکھنے والے ہمیں دیکھیں کہ ہم دریا ہوئے

ندی نالے ہیں یہ سب جب تک نہ دریا سے ملیں

جب یہ دریا سے ملے جا کر تو سب دریا ہوئے

حضرت مجنوں تمہارے عشق کو میرا سلام

کوچۂ لیلیٰ سے نکلے ساکن صحرا ہوئے

قبر میں بھی اکبرؔ اس کو ساتھ ہم لے جائیں گے

الفت حق ساتھ تھی جس وقت ہم پیدا ہوئے