mai-kHana-wahdat ke saqi kar band na bab-e-il-lallah

mai-kHāna-vahdat ke saaqī kar band na bāb-e-il-lallāh

pyāsā huuñ tirī āñkhoñ kī qasam ik jām-e-ḳharāb-e-il-lallāh

ye jām-o-subū meñ lutf kahāñ jo kaif hai us sāġhar meñ nihāñ

paimāna-e-dil meñ piite haiñ ham bāda-e-nāb-e-il-lallāh

dīvāne bhī haiñ hushiyār bhī haiñ be-kār bhī haiñ ham bā-kār bhī haiñ

piite haiñ pilāte rahte haiñ mastoñ ko sharāb-e-il-lallah

jalvat meñ maze huuñ ḳhalvat ke ḳhalvat meñ tamāshe jalvat ke

khul jaa.e jo bāb-e-il-lallāh uTh jaa.e hijāb-e-il-lallāh

dil madrasa-e-vahdat hai mirā hotī hai yahāñ tā'līm-e-fanā

dar-parda bayāñ karatā hai koī asrār-e-kitāb-e-il-lallāh

saaqī se ye mai-kash kahte haiñ dam toḌ rahe haiñ sakte meñ

jāmoñ se nahīñ āñkhoñ se pilā mastoñ ko sharāb-e-il-lallah

'mohsin' tirī āñḳheñ kahtī haiñ maḳhmūr nigāheñ kahtī haiñ

bhar dī hai magar un pyāloñ meñ saaqī ne sharāb-e-il-lallah

mai-kHana-wahdat ke saqi kar band na bab-e-il-lallah

pyasa hun teri aankhon ki qasam ek jam-e-KHarab-e-il-lallah

ye jam-o-subu mein lutf kahan jo kaif hai us saghar mein nihan

paimana-e-dil mein pite hain hum baada-e-nab-e-il-lallah

diwane bhi hain hushiyar bhi hain be-kar bhi hain hum ba-kar bhi hain

pite hain pilate rahte hain maston ko sharab-e-il-lallah

jalwat mein maze hun KHalwat ke KHalwat mein tamashe jalwat ke

khul jae jo bab-e-il-lallah uTh jae hijab-e-il-lallah

dil madrasa-e-wahdat hai mera hoti hai yahan ta'lim-e-fana

dar-parda bayan karata hai koi asrar-e-kitab-e-il-lallah

saqi se ye mai-kash kahte hain dam toD rahe hain sakte mein

jamon se nahin aankhon se pila maston ko sharab-e-il-lallah

'mohsin' teri aanKHen kahti hain maKHmur nigahen kahti hain

bhar di hai magar un pyalon mein saqi ne sharab-e-il-lallah