aashiq-e-zar hun main talib-e-aram nahin

āshiq-e-zār huuñ maiñ tālib-e-ārām nahīñ

nañg-o-nāmūs se kuchh apne ta.iiñ kaam nahīñ

be-sar-o-pā.ī se ushshāq ko ḳhatra kyā hai

asar-e-ishq hai ye gardish-e-ayyām nahīñ

nashsha-e-chashm se huuñ sāqī-e-tauhīd ke mast

ehtiyāj apne ta.iiñ zarf-e-mai-o-jām nahīñ

bul-havas paañv na rakhiyo kabhī is raah ke beach

kūcha-e-ishq hai ye rahguzar-e-ām nahīñ

be-nihāyat hai ke paayā nahīñ jis kā pāyāñ

jis jagah pahuñch.e āġhāz hai anjām nahīñ

a.alam-e-ishq kī duniyā hī nirālī dekhī

sahar-o-shām vahāñ ye sahar-o-shām nahīñ

zāhidā haal mirā dekh ke hairāñ kyuuñ hai

mashrab-e-kufar hai ye millat-e-islām nahīñ

sāqī-e-mast ke dīdār kā sarshār huuñ maiñ

isliye dil ko tamnnā-e-mai-o-jām nahīñ

aar kyā hai tujhe duniyā kī malāmat se 'niyāz'

āshiqoñ meñ tū akelā hī to badnām nahīñ

aashiq-e-zar hun main talib-e-aram nahin

nang-o-namus se kuchh apne tain kaam nahin

be-sar-o-pai se ushshaq ko KHatra kya hai

asar-e-ishq hai ye gardish-e-ayyam nahin

nashsha-e-chashm se hun saqi-e-tauhid ke mast

ehtiyaj apne tain zarf-e-mai-o-jam nahin

bul-hawas panw na rakhiyo kabhi is rah ke beach

kucha-e-ishq hai ye rahguzar-e-am nahin

be-nihayat hai ke paya nahin jis ka payan

jis jagah pahunche aaghaz hai anjam nahin

aalam-e-ishq ki duniya hi nirali dekhi

sahar-o-sham wahan ye sahar-o-sham nahin

zahida haal mera dekh ke hairan kyun hai

mashrab-e-kufar hai ye millat-e-islam nahin

saqi-e-mast ke didar ka sarshaar hun main

isliye dil ko tamnna-e-mai-o-jam nahin

aar kya hai tujhe duniya ki malamat se 'niyaz'

aashiqon mein tu akela hi to badnam nahin