wo yar hai mera are o dekhne walo

vo yaar hai merā are o dekhne vaalo

dekhā na ho gar tum ne ḳhudā dekh lo yaaro

us naqsha kī tasvīr banī hai na banegī

kis haath ke ho tum bane o naqsh-nigāro

hai shāhid-e-gul jalva-numā taḳht-e-chaman par

ai bulbulo sab mil ke chalo jī ko nisāro

dar mulk-e-dilam shāh-e-junūñ laa.e haiñ tashrīf

ai aql-o-ḳhirad ab chalo bāhar ko sidhāro

Thānī hai yahāñ muġhbachoñ ne aaj ye dil meñ

vaa.iz jo mile us ke amāma ko utāro

ai chashm-e-jigar mil ke ba-ham sīna-o-dil saath

dharnā do us yaar ke darvāze pe chāro

kis dil kī imārat huī hai aaj ye mismār

aate ho kahāñ se uThe o gard-o-ġhubāro

kahtā hai 'niyāz' aur ġhazal aisī hī suniyo

kānoñ ko idhar rakh ke zarā husn-shi'āro

wo yar hai mera are o dekhne walo

dekha na ho gar tum ne KHuda dekh lo yaro

us naqsha ki taswir bani hai na banegi

kis hath ke ho tum bane o naqsh-nigaro

hai shahid-e-gul jalwa-numa taKHt-e-chaman par

ai bulbulo sab mil ke chalo ji ko nisaro

dar mulk-e-dilam shah-e-junun lae hain tashrif

ai aql-o-KHirad ab chalo bahar ko sidhaaro

Thani hai yahan mughbachon ne aaj ye dil mein

waiz jo mile us ke amama ko utaro

ai chashm-e-jigar mil ke ba-ham sina-o-dil sath

dharna do us yar ke darwaze pe chaaro

kis dil ki imarat hui hai aaj ye mismar

aate ho kahan se uThe o gard-o-ghubaro

kahta hai 'niyaz' aur ghazal aisi hi suniyo

kanon ko idhar rakh ke zara husn-shi'aro