kis sautan sang pit lagai kis sautan ke dwar gae

kis sautan sañg piit lagā.ī kis sautan ke dvaar ga.e

takte takte raah tumhārī nain hamāre haar ga.e

nain milā.e the to rakhte laaj bhī nain milāne kī

aañkh churā kar kyuuñ birhan ke tiir kaleje maar ga.e

Duub gayā har ek kināra birahā ke añdhiyāre meñ

biich bhañvar ke chhoḌ ke nayyā tum kit khevan-hār ga.e

palkoñ par jal diip jalā kar nain bichhe haiñ rāhoñ meñ

aa jaao pardesī bālam tum jiite ham haar ga.e

maañg mirī sindūr ko tarse naināñ tarseñ kājal ko

ruuTh ke mujh se saath tumhār saare haar siñgār ga.e

kis kī piit ke jaal meñ phañs kar hamrī sudh bisrā.ī hai

rotī chhoḌ ke birhan ko tum kaun se des sidhār ga.e

kis sautan sang pit lagai kis sautan ke dwar gae

takte takte rah tumhaari nain hamare haar gae

nain milae the to rakhte laj bhi nain milane ki

aankh chura kar kyun birhan ke tir kaleje mar gae

Dub gaya har ek kinara biraha ke andhiyare mein

bich bhanwar ke chhoD ke nayya tum kit khewan-haar gae

palkon par jal dip jala kar nain bichhe hain rahon mein

aa jao pardesi baalam tum jite hum haar gae

mang meri sindur ko tarse nainan tarsen kajal ko

ruTh ke mujh se sath tumhaar sare haar singar gae

kis ki pit ke jal mein phans kar hamri sudh bisrai hai

roti chhoD ke birhan ko tum kaun se des sidhaar gae