ye teri jalwa-gariyan aankhon mein chha rahi hain

ye terī jalva-gariyāñ āñkhoñ meñ chhā rahī haiñ

pyāre adā.eñ terī dil meñ samā rahī haiñ

ġhamza ke lashkaroñ ko apnā hī tantana hai

saj-dhaj jo dekho apnī naubat bajā rahī haiñ

tarf-e-chaman huā hai shāyad guzar tumhārā

jo aaj andalībeñ dhūmeñ machā rahī haiñ

khul jaa.eñ terī nargis āñḳheñ jo dekhe us ko

jab tak nahīñ hai dekhā bāteñ banā rahī haiñ

mehrāb-e-sajda kahiye yā teġh in bhavoñ ko

lākhoñ hī sar jo aage apne jhukā rahī haiñ

e.ajāz kar rahī haiñ nāz-o-adā.en terī

vo qatl kar rahī haiñ aur ye jilā rahī haiñ

bhātā nahīñ hai koī tujh bin 'niyāz' ko ab

terī hī pyārī bāteñ us ko to bhā rahī haiñ

kyūñkar 'niyāz' maane auroñ kī ḳhush-kalāmī

us ko to pyārī bāteñ pyāre kī bhā rahī hiiñ

ye teri jalwa-gariyan aankhon mein chha rahi hain

pyare adaen teri dil mein sama rahi hain

ghamza ke lashkaron ko apna hi tantana hai

saj-dhaj jo dekho apni naubat baja rahi hain

tarf-e-chaman hua hai shayad guzar tumhaara

jo aaj andaliben dhumen macha rahi hain

khul jaen teri nargis aanKHen jo dekhe us ko

jab tak nahin hai dekha baaten bana rahi hain

mehrab-e-sajda kahiye ya tegh in bhawon ko

lakhon hi sar jo aage apne jhuka rahi hain

eajaz kar rahi hain naz-o-adaen teri

wo qatl kar rahi hain aur ye jila rahi hain

bhata nahin hai koi tujh bin 'niyaz' ko ab

teri hi pyari baaten us ko to bha rahi hain

kyunkar 'niyaz' mane auron ki KHush-kalami

us ko to pyari baaten pyare ki bha rahi hin