ایک شاعر کا روزِعاشورہ حلب میں پہنچنا۔ دفترششم

عاشورہ کے روز اہلِ حلب بابِ انطاکیہ میں رات کو جمع ہوتے ہیں۔ شیعہ لوگ رات بھر وہاں نوحہ و بکا کرتے اور کربلا کا عاشورہ یاد کرتے ہیں۔ یزید و شمر کے مظالم سے جو کچھ اس خاندان پر گزری ان تمام مصیبتوں اور آزمایشوں کا ذکر کرتے ہیں۔ اس قدر چیخیں اور نعرے لگاتے ہیں کہ سارا جنگل اور میدان گونج اٹھتا ہے۔

قضا را ایک پردیسی شاعر عاشورے کے دن وہاں پہنچا اور رونے دھونے کی آوازیں آرہی تھیں۔ بڑی رحمدلی اور ہمدردی کے جوش میں پوچھتا جارہاتھا کہ کاہے کا غم ہےاور یہ ماتم کون کررہاہے؟ شاید کوئی بڑا امیر مرگیا ہے کیوں کہ اتنا بڑا مجمع معمولی نہیں ہے۔ اس امیر کا نام اور اوصاف مجھے بتاؤ کیوں کہ میں مسافر ہوں۔ میں اس کی مہربانیوں اور احسانات پر مرثیہ لکھوں گا۔ کسی نے کہا ارے دیوانہ ہوگیا۔ تو شیعہ نہیں بلکہ خانۂ رسالت کا دشمن معلوم ہوتاہے۔ اتنا بھی نہیں معلوم کہ آج عاشورے کا دن ہے اور ایسی روحِ پاک کا ماتم ہے جو اپنی صدی کی سب روحوں سے افضل تھی۔ بھلا مومن کے نزدیک یہ واقعہ کیسے حقیر ہوسکتا ہے۔ جسے کان سے محبت ہوگی اسے بالی سے محبت ضرورہوگی۔ شاعر نے کہا یہ تو سچ ہے مگر اب یزید کا زمانہ کہاں رہا اور یہ غم کس زمانے میں گزرا اور کتنی مدت میں یہاں تک پہنچا۔ کیا تم اب تک سوتے رہے کہ اس وقت ماتم میں کپڑے پھاڑتے ہو۔

اے غافلو! تم اپنا ماتم کرو کیوں کہ تمہاری غفلت موت سے بدتر ہے۔ ایک بادشاہ کی روح قیدخانے سے چھٹی۔ ہم کیوں کپڑے پھاڑیں اور کیوں ہاتھ چبائیں؟ چوں کہ وہ بزرگ دین کے بادشاہ گزرے ہیں، اس لئے یہ تو خوشی کا موقع ہے کہ انہوں نے قید وبند توڑے اور ابدی سلطنت کی طرف چل نکلےاور قید خانے کی زنجیروں کو یہیں چھوڑ گئے۔ اگر تو ذرہ بھر بھی ان سے واقف ہے تو اب تو زمانہ ان کی حکومت اور خودمختاری کا ہے۔ اب اس پر رونا کیسا؟