لوگوں کا اندھیری رات میں ہاتھی کی شناخت پر اختلاف کرنا۔ دفترسوم

اے تہہ دیکھنے والے ! کافر و مومن و بت پرست کا فرق الگ الگ پہلو سے نظر ڈالنے کے باعث ہی تو ہے۔

کسی غیر ملک میں اہلِ ہند ایک ہاتھی دکھانے لائے اور اسے بالکل تاریک مکان میں باندھ دیا۔ لوگ باری باری سے آتے اور اس اندھیرے گھر میں داخل ہوتے۔ وہاں صاف کچھ نظر نہ آتا تھا اس لیے ہر شخص اس کو ہاتھ سے ٹٹولتا تھا۔ جس کا ہاتھ سونڈ پر پڑا اس نے کہا کہ ہاتھی نلوے جیسا ہے اور جس کا ہاتھ کان پر پڑا اس نے جانا کہ وہ پنکھے جیسا ہے اور جس کا ہاتھ پیر پر پڑا اس نے کہا وہ ستون جیسا ہے اور جس کا ہاتھ اس کی پیٹھ پر پڑا اس نے کہا کہ ہاتھی تو تخت کی مانند ہے۔

اسی طرح ہر شخص جانتا تھا کہ بس ہاتھی ویسا ہی ہے جیسا کہ اس نے ٹٹول کر جانا ہے۔ ہر ایک کی ٹٹول جدا تھی۔ اس لیے کسی نے دال کہا اور کسی نے الف۔ اگر ہر شخص کے ہاتھ میں شمع ہوتی تو سب کا اختلاف مٹ جاتا۔ آنکھوں کی بینائی بھی ہاتھ کی مانند ہے کہ ہاتھ پورا ہاتھی معلوم کرنے کی قدرت نہیں رکھتا۔ دریا کا پاٹ اور ہے اور دریا کے جھاگ دوسری چیز ہیں۔ تجھے چاہیے کہ جھا گ سے نظر ہٹائے اور آنکھوں سے دریا کو دیکھے۔ رات دن دریا سے جھاگ اٹھتے ہیں تو انہیں دیکھتا ہے مگر تعجب ہے کہ دریا کو نہیں دیکھتا۔