kyun humse kinara kar baiThe kyun aana jaana chhoD diya

kyuuñ ham se kinārā kar baiThe kyuuñ aanā jaanā chhoḌ diyā

bīmār-e-mohabbat ke dil par kyuuñ barq girānā chhoḌ diyā

jab tak bigaḌte aap rahe ham aap ko roz manāte rahe

jab aap ne rūThnā chhoḌ diyā ham ne bhī sunānā chhoḌ diyā

jab ġhaur se sunte aap rahe ham kahte rahe afsāna-e-dil

jab aap ne sunñā chhoḌ diyā ham ne bhī sunānā chhoḌ diyā

’aadī the bahut ham piine ke 'ādat sī paḌī thī piine kī

saaqī ne jab āñkheñ dikhlā diiñ sab pīnā-pilānā chhoḌ diyā

dil dard se jaltā rahtā hai ab maare maare phirte ham

jis roz se us but ne ham ko siine se lagānā chhoḌ diyā

na vo lazzat-e-rāz-o-niyāz rahī na vo raunaq-e-soz-sāz rahī

jis din se hamārī mahfil meñ us shoḳh ne aanā chhoḌ diyā

tire jaur-o-jafā se tañg aakar ab ham ne bhī āḳhir ai 'āzam'

hañs-hañs ke rulānā siikh liyā ro-ro ke manānā chhoḌ diyā

kyun hum se kinara kar baiThe kyun aana jaana chhoD diya

bimar-e-mohabbat ke dil par kyun barq girana chhoD diya

jab tak bigaDte aap rahe hum aap ko roz manate rahe

jab aap ne ruThna chhoD diya hum ne bhi sunana chhoD diya

jab ghaur se sunte aap rahe hum kahte rahe afsana-e-dil

jab aap ne sunna chhoD diya hum ne bhi sunana chhoD diya

’adi the bahut hum pine ke 'adat si paDi thi pine ki

saqi ne jab aankhen dikhla din sab pina-pilana chhoD diya

dil dard se jalta rahta hai ab mare mare phirte hum

jis roz se us but ne hum ko sine se lagana chhoD diya

na wo lazzat-e-raaz-o-niyaz rahi na wo raunaq-e-soz-saz rahi

jis din se hamari mahfil mein us shoKH ne aana chhoD diya

tere jaur-o-jafa se tang aakar ab hum ne bhi aaKHir ai 'azam'

hans-hans ke rulana sikh liya ro-ro ke manana chhoD diya