dastan ishq-o-mohabbat ki kitabon mein nahin

dāstāñ ishq-o-mohabbat kī kitāboñ meñ nahīñ

jo nashsha aañkh meñ terī hai sharāboñ meñ nahīñ

ruup badlā hai ki Dhaa.ī hai qiyāmat tū ne

log kahte haiñ nazar aatā hai jo ḳhvāboñ meñ nahīñ

kaun kahtā hai tujhe parda-nashīñ jān-e-jahāñ

zarra zarra se ayaañ to hai hijāboñ meñ nahīñ

bū-e-ahmad hai kahīñ aur kahīñ rañg-e-alī

ye kuchh kamī gulshan-e-zahrā ke gulāboñ meñ nahīñ

har adā terī nirālī hai magar jān-e-jahāñ

ek insāñ meñ samā jaanā hisāboñ meñ nahīñ

ho alag tujh se to 'kāvish' kahe apnī rūdād

apnī hastī bhī samundar ke habāboñ meñ nahīñ

dastan ishq-o-mohabbat ki kitabon mein nahin

jo nashsha aankh mein teri hai sharabon mein nahin

rup badla hai ki Dhai hai qiyamat tu ne

log kahte hain nazar aata hai jo KHwabon mein nahin

kaun kahta hai tujhe parda-nashin jaan-e-jahan

zarra zarra se ayan to hai hijabon mein nahin

bu-e-ahmad hai kahin aur kahin rang-e-ali

ye kuchh kami gulshan-e-zahra ke gulabon mein nahin

har ada teri nirali hai magar jaan-e-jahan

ek insan mein sama jaana hisabon mein nahin

ho alag tujh se to 'kawish' kahe apni rudad

apni hasti bhi samundar ke hababon mein nahin