اے مہ جبیں کہاں تیرا جلوہ عیاں نہیں

اے مہ جبیں کہاں تیرا جلوہ عیاں نہیں

یہ سب تیرے نشاں ہیں پہ تیرا نشاں نہیں

کعبہ میں کربلا میں کلیسا میں دیر میں

اس بے نشاں کو ہم نے بھی ڈھونڈھا کہاں نہیں نہیں

اقرار روز کرتے ہو غیروں سے وصل کا

سیکھے ہو ایک میرے لیے جان جاں نہیں

کرتا ہے میرا وعدہ فراموش مجھ کو یاد

بے وجہ آ جاتی ہیں یہ ہچکیاں نہیں

منت سے پوچھا کیا نہ کرو گے جفائیں کم

سفاک کس ڈھٹائی سے بولا کہ ہاں نہیں

شکوہ کجا شکایت غم کیجے کیا مجال

اس کا یہ حکم ہے کہ ہلاؤ زباں نہیں

سچے تمہیں سہی میں برا ہوں برا مگر

مجھ سا ملے گا بعد میرے مہرباں نہیں

واعظ بھلا حسینوں کی الفت ہے کیوں حرام

شاید خدا کی شان یہ حسن بتاں نہیں

اوگھٹؔ جہاں میں اب دل و دیں پوچھتا ہے کون

عاشق کا ان بتوں میں کوئی قدر داں نہیں