partaw nahin kab usMein kisi KHush-jamal ka

partav nahīñ kab us meñ kisī ḳhush-jamāl kā

bazm-e-parī hai ā.īna apne ḳhayāl kā

har zarra āftāb se karatā hai hamsarī

allāh re daaġh tire pā.emāl kā

samjhe haiñ jis ko ahl-e-zamīñ charḳh-e-ābgūñ

ik shīsha hai mere araq-e-infi.āl kā

raushan diloñ kā aib bhī beshubha hai hunar

kyūñkar na baḌh ke badr ho nāḳhun hilāl kā

ai chashm-e-yār bhaag na mujh tīra-baḳht se

hamrāh hai ġhazāl ke saaya ġhazāl kā

tīr-e-nigah jab us kā chalā hai sū-e-falak

chilla uḌā diyā hai kamān-e-hilāl kā

kis zulf-e-mushk-fām kā aks us meñ paḌ gayā

a.alam hai aarsī meñ jo nāf-e-ġhazāl kā

hil hil ke aisī dāman-e-gesū ne dī havā

sho.ala bhaḌak gayā tire husn-o-jamāl kā

kyā kaam aa.egī tirī gardish phir ai falak

furqat kī shab se roz badal de visāl kā

mujh tak kab aa sakegī sipāh-e-sazā-e-jurm

dariyā hai biich meñ araq-e-infi.āl kā

ahmad jo the rahīm na thā saaya is liye

dil pis na jaa.e zer-e-qadam pā.emāl kā

shauq-e-javāb-e-ḳhat hai dam-e-naz.a bhī 'amīr'

huuñ muntazir maiñ qāsid-e-farḳhunda-fāl kā

partaw nahin kab us mein kisi KHush-jamal ka

bazm-e-pari hai aaina apne KHayal ka

har zarra aaftab se karata hai hamsari

allah re dagh tere paemal ka

samjhe hain jis ko ahl-e-zamin charKH-e-abgun

ek shisha hai mere araq-e-infial ka

raushan dilon ka aib bhi beshubha hai hunar

kyunkar na baDh ke badr ho naKHun hilal ka

ai chashm-e-yar bhag na mujh tira-baKHt se

hamrah hai ghazal ke saya ghazal ka

tir-e-nigah jab us ka chala hai su-e-falak

chilla uDa diya hai kaman-e-hilal ka

kis zulf-e-mushk-fam ka aks us mein paD gaya

aalam hai aarsi mein jo naf-e-ghazal ka

hil hil ke aisi daman-e-gesu ne di hawa

shoala bhaDak gaya tere husn-o-jamal ka

kya kaam aaegi teri gardish phir ai falak

furqat ki shab se roz badal de visal ka

mujh tak kab aa sakegi sipah-e-saza-e-jurm

dariya hai bich mein araq-e-infial ka

ahmad jo the rahim na tha saya is liye

dil pis na jae zer-e-qadam paemal ka

shauq-e-jawab-e-KHat hai dam-e-naza bhi 'amir'

hun muntazir main qasid-e-farKHunda-fal ka