KHudi se be-KHudi mein aa jo shauq-e-haq-parasti hai

ḳhudī se be-ḳhudī meñ aa jo shauq-e-haq-parastī hai

jise tū nīstī samjhā hai ai ġhāfil vo hastī hai

kahīñ zaa.id kahīñ kam bāda-e-irfāñ kī mastī hai

ba-qadr-e-vus.at-e-mashrab maqām-e-mai-parastī hai

tire qurbān ai marg-e-ġharībī jald ab le chal

vatan ke dekhne ko ruuh muddat se tarastī hai

ġhazab ke josh meñ hai duḳhtar-e-raz ḳhair ho saaqī

bharī baiThī hai dekhā chāhiye kis par barastī hai

dil-e-vīrāñ ko mere dekh kar kahtī hai vīrānī

ḳhudā ābād rakhe is ko kyā dilchasp bastī hai

na shāḳh-e-gul hī ūñchī hai na dīvār-e-chaman bulbul

tirī himmat kī kotāhī tirī qismat kī pastī hai

na ghabrā ai dile-vāmāñda ab manzil qarīb aa.ī

isī bastī ke aage aur ābād ek bastī hai

na ho jo aap hī meñ us se phir pās-e-adab kaisā

takalluf bar-taraf saaqī kī vaqt-e-josh-e-mastī hai

nigāh-e-nāz ḳhāl-e-ruḳh se maidān-e-mohabbat meñ

sitam ke tiir paḌte haiñ ġhazab golī barastī hai

judā ham aur dast-e-ġhair-o-zulf-e-dilbar-o-shānā

ḳhudā kī shaan jo paspā the un ko pesh-dastī hai

ḳhudā jaane tirā jī lag gayā duniyā meñ kyuuñ ai dil

ujaaḌ ik chand ghar haiñ be-haqīqat sī ye bastī hai

qadam jis ḳhaak par paḌtā hai tere ḳhāk-sāroñ kā

agar iksīr ke moloñ vo haath aa.e to sastī hai

balā.eñ lete lete mast ho jaatī hai mashshāta

vo choTī argaje ke itr meñ jis vaqt bastī hai

raheñ kyūñkar na gird us rū-e-ātish rañg ke gesū

ibādat hinduoñ ke diin meñ ātish-parastī hai

nahīñ bachtā hai dil par daaġh terī zulf-e-pechāñ se

ye vo nāgin hai jo tā.ūs ko uḌ uḌ ke Dastī hai

'amīr' aatī hai ye āvāz nāqūs-e-barahman se

but-e-pindār ko toḌo jo shauq-e-but-parastī hai

KHudi se be-KHudi mein aa jo shauq-e-haq-parasti hai

jise tu nisti samjha hai ai ghafil wo hasti hai

kahin zaid kahin kam baada-e-irfan ki masti hai

ba-qadr-e-wusat-e-mashrab maqam-e-mai-parasti hai

tere qurban ai marg-e-gharibi jald ab le chal

watan ke dekhne ko ruh muddat se tarasti hai

ghazab ke josh mein hai duKHtar-e-raz KHair ho saqi

bhari baiThi hai dekha chahiye kis par barasti hai

dil-e-viran ko mere dekh kar kahti hai virani

KHuda aabaad rakhe is ko kya dilchasp basti hai

na shaKH-e-gul hi unchi hai na diwar-e-chaman bulbul

teri himmat ki kotahi teri qismat ki pasti hai

na ghabra ai dile-wamanda ab manzil qarib aai

isi basti ke aage aur aabaad ek basti hai

na ho jo aap hi mein us se phir pas-e-adab kaisa

takalluf bar-taraf saqi ki waqt-e-josh-e-masti hai

nigah-e-naz KHal-e-ruKH se maidan-e-mohabbat mein

sitam ke tir paDte hain ghazab goli barasti hai

juda hum aur dast-e-ghair-o-zulf-e-dilbar-o-shana

KHuda ki shan jo paspa the un ko pesh-dasti hai

KHuda jaane tera ji lag gaya duniya mein kyun ai dil

ujaD ek chand ghar hain be-haqiqat si ye basti hai

qadam jis KHak par paDta hai tere KHak-saron ka

agar iksir ke molon wo hath aae to sasti hai

balaen lete lete mast ho jati hai mashshata

wo choTi argaje ke itr mein jis waqt basti hai

rahen kyunkar na gird us ru-e-atish rang ke gesu

ibaadat hinduon ke din mein aatish-parasti hai

nahin bachta hai dil par dagh teri zulf-e-pechan se

ye wo nagin hai jo taus ko uD uD ke Dasti hai

'amir' aati hai ye aawaz naqus-e-barahman se

but-e-pindar ko toDo jo shauq-e-but-parasti hai