jamal-e-yar ko kahte ho tum ki han dekha

jamāl-e-yār ko kahte ho tum ki haañ dekhā

kalīm hosh meñ aao bhī kahāñ dekhā

vahī charāġh vahī gul vahī qamar vahī barq

na.e libās meñ dekhā use jahāñ dekhā

nahīñ hai duḳht-e-raz sā bhī koī husn-parast

Tapak paḌī ye jahāñ koī naujavāñ dekhā

fanā hai husn ko daulat ko zindagānī ko

jahāñ meñ na koī bāġh-e-be-ḳhizāñ dekhā

phañsī jo daam meñ bulbul to kin nigāhoñ se

kabhī chaman ko kabhī sū-e-āshiyāñ dekhā

shab-e-visāl vo sāmāñ vo raushnī vo nishāt

huī jo sub.h to ujḌā huā makāñ dekhā

bahār meñ jo nikālā hameñ to kyā paayā

ḳhizāñ meñ hāl-e-chaman tuune bāġhbāñ dekhā

tire visāl kī furqat meñ ham ko yaad aa.ī

luTā huā jo kahīñ koī kārvāñ dekhā

kaheñge vaqt-e-mulāqāt un se itnī baat

jo kuchh sunā thā vo āñkhoñ se mehrbāñ dekhā

dikhā.ī tark-e-ta.alluq ne shān-e-be-rañgī

baḌhe makān se aage to lā-makāñ dekhā

nukīlī chitvaneñ āñkhoñ meñ kyā jigar meñ chubheñ

'amīr' aaj ajab nok kā javāñ dekhā

jamal-e-yar ko kahte ho tum ki han dekha

kalim hosh mein aao bhi kahan dekha

wahi charagh wahi gul wahi qamar wahi barq

nae libas mein dekha use jahan dekha

nahin hai duKHt-e-raz sa bhi koi husn-parast

Tapak paDi ye jahan koi naujawan dekha

fana hai husn ko daulat ko zindagani ko

jahan mein na koi bagh-e-be-KHizan dekha

phansi jo dam mein bulbul to kin nigahon se

kabhi chaman ko kabhi su-e-ashiyan dekha

shab-e-visal wo saman wo raushni wo nishat

hui jo subh to ujDa hua makan dekha

bahaar mein jo nikala hamein to kya paya

KHizan mein haal-e-chaman tune baghban dekha

tere visal ki furqat mein hum ko yaad aai

luTa hua jo kahin koi karwan dekha

kahenge waqt-e-mulaqat un se itni baat

jo kuchh suna tha wo aankhon se mehrban dekha

dikhai tark-e-talluq ne shan-e-be-rangi

baDhe makan se aage to la-makan dekha

nukili chitwanen aankhon mein kya jigar mein chubhen

'amir' aaj ajab nok ka jawan dekha