bulwaen mujhe shad jo sultan-e-madina

bulvā.eñ mujhe shaad jo sultān-e-madīna

jaate hī maiñ ho jā.ūñgā qurbān-e-madīna

vo ghar se ḳhudā kā to ye mahbūb-e-ḳhudā haiñ

kā'be se bhī 'aalā na ho kyuuñ shān-e-madīna

rokeñge na darbār meñ jaane ke liye shaad

pahchānte haiñ sab mujhe darbān-e-madīna

le jā.ūñgā maiñ saath faqat 'ishq-e-mohammad

tohfa hai mire paas ye shāyān-e-madīna

khole dar-e-jannat ko yahī kahtā hai rizvāñ

be-ḳhauf chale jaa.eñ ġhilmān-e-madīna

nashsha hai vo un ko jo utartā hī nahīñ hai

tauhīd kī mai piite haiñ mastān-e-madīna

allāh dikhā de tū mujhe rauza-e-aqdas

baaqī kahīñ rah jaa.e na armān-e-madīna

kyuuñ merī shafā'at meñ bhalā der lagegī

kyā mujh ko nahīñ jānte sultān-e-madīna

momin jo nahīñ huuñ to maiñ kāfir bhī nahīñ huuñ

is ramz se āgāh haiñ sultān-e-madīna

bulwaen mujhe shad jo sultan-e-madina

jate hi main ho jaunga qurban-e-madina

wo ghar se KHuda ka to ye mahbub-e-KHuda hain

ka'be se bhi 'ala na ho kyun shan-e-madina

rokenge na darbar mein jaane ke liye shad

pahchante hain sab mujhe darban-e-madina

le jaunga main sath faqat 'ishq-e-mohammad

tohfa hai mere pas ye shayan-e-madina

khole dar-e-jannat ko yahi kahta hai rizwan

be-KHauf chale jaen ghilman-e-madina

nashsha hai wo un ko jo utarta hi nahin hai

tauhid ki mai pite hain mastan-e-madina

allah dikha de tu mujhe rauza-e-aqdas

baqi kahin rah jae na arman-e-madina

kyun meri shafa'at mein bhala der lagegi

kya mujh ko nahin jaante sultan-e-madina

momin jo nahin hun to main kafir bhi nahin hun

is ramz se aagah hain sultan-e-madina