main us manzil mein hun ye dil ki haalat hoti jati hai

maiñ us manzil meñ huuñ ye dil kī hālat hotī jaatī hai

ki har sūrat sazā-vār-e-mohabbat hotī jaatī hai

samajh rakhā hai jis ne tum ko hāsil zindagānī kā

ḳhudā jaane tumheñ kyuuñ us se nafrat hotī jaatī hai

agar hai tere dil meñ merī ulfat kā vahī 'ālam

to phir āvāra kyuuñ merī mohabbat hotī jaatī hai

kahīñ zarre kahīñ taare kahīñ ġhunche kahīñ jugnū

mujhe us ā.īna-ḳhāna meñ hairat hotī jaatī hai

vo āġhāz-e-mohabbat ke bhī kyā din the are tauba

ki ab har shaam ik shām-e-musībat hotī jaatī hai

tumhārā kyā tumhār pūjne vāloñ meñ duniyā hai

hamārā kyā hameñ duniyā se nafrat hotī jaatī hai

mujhe majbūr-e-ulfat jaan kar tum chāhte kyā ho

maiñ jitnā dabtā jaatā huuñ shikāyat hotī jaatī hai

main us manzil mein hun ye dil ki haalat hoti jati hai

ki har surat saza-war-e-mohabbat hoti jati hai

samajh rakha hai jis ne tum ko hasil zindagani ka

KHuda jaane tumhein kyun us se nafrat hoti jati hai

agar hai tere dil mein meri ulfat ka wahi 'alam

to phir aawara kyun meri mohabbat hoti jati hai

kahin zarre kahin tare kahin ghunche kahin jugnu

mujhe us aaina-KHana mein hairat hoti jati hai

wo aaghaz-e-mohabbat ke bhi kya din the are tauba

ki ab har sham ek sham-e-musibat hoti jati hai

tumhaara kya tumhaar pujne walon mein duniya hai

hamara kya hamein duniya se nafrat hoti jati hai

mujhe majbur-e-ulfat jaan kar tum chahte kya ho

main jitna dabta jata hun shikayat hoti jati hai