na samjha umr-bhar koi ki main bhi tera bismil tha

na samjhā 'umr-bhar koī ki maiñ bhī terā bismil thā

laboñ par thī hañsī zaḳhmoñ se go chhalnī mirā dil thā

jhukā sar ġhair ke aage na dil duniyā pe maa.il thā

saroñ meñ sar mirā sar thā diloñ meñ dil mirā dil thā

ye sab maanā ki vo saffāk thā zālim thā qātil thā

diyā jis ko diyā haañ phir kisī ko kyā mirā dil thā

tarīq-e-'ishq meñ jo jis qadar gum-karda manzil thā

vo bas utnā hī ai dil ḳhizr-e-rah banñe ke qābil thā

hazāroñ zaḳhm khā kar bhī na taḌpā haaye majbūrī

bas ik tasvīr-e-be-tābī sarāpā terā bismil thā

bahar-sūrat thī ik taklīf bīmārī-e-ulfat meñ

mujhe āsān thā marnā magar parhez mushkil thā

ġhanīmat hai ki mujh ko qa’ar-e-dariyā ne jagah de dī

vabāl-e-dosh mauj-e-āb thā meñ bār-e-sāhil thā

ḳhudā 'majzūb' ko rakhe salāmat us ne chauñkāyā

jise manzil samajh rakhā thā vo ik kHvāb-e-manzil thā

na samjha 'umr-bhar koi ki main bhi tera bismil tha

labon par thi hansi zaKHmon se go chhalni mera dil tha

jhuka sar ghair ke aage na dil duniya pe mail tha

saron mein sar mera sar tha dilon mein dil mera dil tha

ye sab mana ki wo saffak tha zalim tha qatil tha

diya jis ko diya han phir kisi ko kya mera dil tha

tariq-e-'ishq mein jo jis qadar gum-karda manzil tha

wo bas utna hi ai dil KHizr-e-rah banne ke qabil tha

hazaron zaKHm kha kar bhi na taDpa haye majburi

bas ek taswir-e-be-tabi sarapa tera bismil tha

bahar-surat thi ek taklif bimari-e-ulfat mein

mujhe aasan tha marna magar parhez mushkil tha

ghanimat hai ki mujh ko qa’ar-e-dariya ne jagah de di

wabaal-e-dosh mauj-e-ab tha mein bar-e-sahil tha

KHuda 'majzub' ko rakhe salamat us ne chaunkaya

jise manzil samajh rakha tha wo ek kHwab-e-manzil tha