jahan badla to badla tu bhi ai jaan-e-jahan badla

jahāñ badlā to badlā tū bhī ai jān-e-jahāñ badlā

zamīñ badlī to badlī thī ġhazab hai āsmāñ badlā

mirī duniyā-e-dūñ ko tū ne ai pīr-e-muġhāñ badlā

qiyās ab ho gayā ’irfāñ tumhīñ se ab gumāñ badlā

tarīq-e-'ishq meñ go kārvāñ par kārvāñ badlā

na lekin rah-guzar badlī na mīr-e-kārvāñ badlā

rahā bār-e-amānat go vabāl-e-dosh raste bhar

na kandhā bhī magar ham ne tah-e-bār-e-garāñ badlā

karūñ kyā dil hai bā-sad zohd-o-taqvā mā.il-e-rindī

jibillat kyā badal saktī 'amal ko apne haañ badlā

na rah chhoḌī na ham ne naqsh-pā-e-rah-ravāñ chhoḌe

havā ke ruḳh pe ruḳh tū ne to gard-e-kārvāñ badlā

bahut go 'ishq meñ 'majzūb' badlā tum ne haal apne

magar jaisā badalnā chāhiye vaisā kahāñ badlā

jahan badla to badla tu bhi ai jaan-e-jahan badla

zamin badli to badli thi ghazab hai aasman badla

meri duniya-e-dun ko tu ne ai pir-e-mughan badla

qiyas ab ho gaya ’irfan tumhin se ab guman badla

tariq-e-'ishq mein go karwan par karwan badla

na lekin rah-guzar badli na mir-e-karwan badla

raha bar-e-amanat go wabaal-e-dosh raste bhar

na kandha bhi magar hum ne tah-e-bar-e-garan badla

karun kya dil hai ba-sad zohd-o-taqwa mail-e-rindi

jibillat kya badal sakti 'amal ko apne han badla

na rah chhoDi na hum ne naqsh-pa-e-rah-rawan chhoDe

hawa ke ruKH pe ruKH tu ne to gard-e-karwan badla

bahut go 'ishq mein 'majzub' badla tum ne haal apne

magar jaisa badalna chahiye waisa kahan badla