jo teri yaad furqat mein meri dam-saz ban jae

jo terī yaad furqat meñ mirī dam-sāz ban jaa.e

to mere dil kī har dhaḌkan tirī āvāz ban jaa.e

taras kuchh aa chalā sayyād ko haañ phaḌphaḌā.e jā

ye shāyad sūrat-e-parvāz hī parvāz ban jaa.e

numāyāñ ho na chehre se na āñkhoñ se na bātoñ se

mohabbat rāz-andar rāz-andar raaz ban jaa.e

haram se karatā hai kis rind ko shaiḳh-e-haram ḳhārij

jahāñ maiñ baiTh jā.ūñ jalva-gāh-e-nāz ban jaa.e

jo haiñ Dālūñ nigāheñ husn meñ sab jazb ho jaa.eñ

koī to naaz ban jaa.e koī andāz ban jaa.e

na uf bhī maiñ ne kī phir bhī jafā kā terī shohra hai

mirā kyā bas ḳhamoshī bhī agar āvāz ban jaa.e

masīhā ho qazā ho yaas ho ummīd ho vo hoñ

koī to chāra-sāz-e-kHātir-e-nāsāz ban jaa.e

piye tū mai to ye terā lab-e-be-kaif ai vaa.iz

lab-e-sāġhar se mil-mil kar lab-e-e.ajāz ban jaa.e

jo teri yaad furqat mein meri dam-saz ban jae

to mere dil ki har dhaDkan teri aawaz ban jae

taras kuchh aa chala sayyaad ko han phaDphaDae ja

ye shayad surat-e-parwaz hi parwaz ban jae

numayan ho na chehre se na aankhon se na baaton se

mohabbat raaz-andar raaz-andar raaz ban jae

haram se karata hai kis rind ko shaiKH-e-haram KHarij

jahan main baiTh jaun jalwa-gah-e-naz ban jae

jo hain Dalun nigahen husn mein sab jazb ho jaen

koi to naz ban jae koi andaz ban jae

na uf bhi main ne ki phir bhi jafa ka teri shohra hai

mera kya bas KHamoshi bhi agar aawaz ban jae

masiha ho qaza ho yas ho ummid ho wo hon

koi to chaara-saz-e-kHatir-e-nasaz ban jae

piye tu mai to ye tera lab-e-be-kaif ai waiz

lab-e-saghar se mil-mil kar lab-e-eajaz ban jae