galim-e-baKHt-e-sayyah-e-saya-dar rakhte hain

galīm-e-baḳht-e-sayyah-e-sāya-dār rakhte haiñ

yahī bisāt meñ ham ḳhāksār rakhte haiñ

basān-e-kāġhaz-e-ātish-zada mere gul-rū

tire jale bhune aur hī bahār rakhte haiñ

ye kis ne ham se kiyā va'ada-e-ham-āġhoshī

ki misl-e-bahar sarāsar kanār rakhte hiiñ

balā hai nashsha-e-duniyā ki tā-qiyāmat aah

sab ahl-e-qabr usī kā ḳhummār rakhte haiñ

butoñ ke jabr uThā.e hazār-hā ham ne

jo us pe bhī na milīñ iḳhtiyār rakhte haiñ

vo zindagī kī tarah ek dam nahīñ rahtā

agarche 'dard' use ham hazār rakhte haiñ

galim-e-baKHt-e-sayyah-e-saya-dar rakhte hain

yahi bisat mein hum KHaksar rakhte hain

basan-e-kaghaz-e-atish-zada mere gul-ru

tere jale bhune aur hi bahaar rakhte hain

ye kis ne hum se kiya wa'ada-e-ham-aghoshi

ki misl-e-bahar sarasar kanar rakhte hin

bala hai nashsha-e-duniya ki ta-qiyamat aah

sab ahl-e-qabr usi ka KHummar rakhte hain

buton ke jabr uThae hazar-ha hum ne

jo us pe bhi na milin iKHtiyar rakhte hain

wo zindagi ki tarah ek dam nahin rahta

agarche 'dard' use hum hazar rakhte hain