na shauq-e-wasl ka mauqa na zauq-e-ashnai ka

na shauq-e-vasl kā mauqa na zauq-e-āshnā.ī kā

maiñ ik nāchīz banda aur use da.ava ḳhudā.ī kā

paḌā sad shukr jo daaġh apne siine meñ judā.ī kā

sitāra ban gayā āḳhir vo sub.h-e-āshnā.ī kā

darāzī dhyān meñ aatī hai kab roz-e-qiyāmat kī

ki ik paivand hai pairāhan roz-e-judā.ī kā

bane jo mauj apne bahr-e-ḳhūñ meñ halqa ai qātil

ilāhī ho vo chhallā terī añgusht-e-hinā.ī kā

naved-e-vasl āshiq ke liye hai sadma-e-furqat

ubharnā baiTh jaanā hai muhīt-e-āshnā.ī kā

jalātā kyuuñ hai ai dil mujh ko shauq-e-vasl bhaḌkā kar

are is aag se tū phūñk de parda judā.ī kā

ilāhī kaun se mujrim kī aamad hai qiyāmat meñ

huā hai hukm ke ko ye kis kī peshvā.ī kā

hadaf dil ko banāte haiñ jo kuchh kahiye to kahte haiñ

sikhāte haiñ chalan tīroñ ko apne dilrubā.ī kā

pahuñch kar yaar tak be-ḳhud hue pahuñche na matlab ko

rasā.ī ne diyā kyā daaġh ham ko nā-rasā.ī kā

qadam terā jahñ paḌtā hai bū mehñdī kī aatī hai

tire naqsh-e-qadam meñ rañg hai pā-e-hinā.ī kā

shab-e-vaslat nazākat un kī shauq-e-vasl se bolī

taras khā mujh pe zālim vaqt hai be-dast-o-pā.ī kā

vafā manzūr us ko bhī nahīñ hai us kī furqat meñ

sabaq paḌhne chalī hai umr us se bevafā.ī kā

tumhīñ tum ā.īna-ḳhāne meñ ho chāroñ taraf dekho

kaho jī ab bhī kuchh armān niklā ḳhud-numā.ī kā

palaT kar saikḌoñ kaalī balā.eñ bose letī haiñ

inhīñ bātoñ se muñh kaalā hai shabhā-e-judā.ī kā

sar us ke paañv par rakhiye banā.e haiñ ye but jis ne

maza hai ḳhaak patthar paa.e but par jab.ha-sā.ī kā

bahut hī bhar gayā hai umr kā paimāna ab chhalkā

charāġh ik jhilmilātā sā hai bazm-e-āshnā.ī kā

qafas meñ huuñ magar saarā chaman āñkhoñ ke aage hai

rihā.ī ke barābar ab tasavvur se rihā.ī kā

nahīñ mumkin hai sonā hijr meñ niiñd aa nahīñ saktī

tilā ye phir rahā hai aañkh meñ tauq-e-tilā.ī kā

amīr-e-kHasta-jāñ aafat meñ hai yā haidar-e-safdar

kaaro imdād is kī vaqt hai mushkil-kushā.ī kā

na shauq-e-wasl ka mauqa na zauq-e-ashnai ka

main ek nachiz banda aur use dawa KHudai ka

paDa sad shukr jo dagh apne sine mein judai ka

sitara ban gaya aaKHir wo subh-e-ashnai ka

daraazi dhyan mein aati hai kab roz-e-qiyamat ki

ki ek paiwand hai pairahan roz-e-judai ka

bane jo mauj apne bahr-e-KHun mein halqa ai qatil

ilahi ho wo chhalla teri angusht-e-hinai ka

nawed-e-wasl aashiq ke liye hai sadma-e-furqat

ubharna baiTh jaana hai muhit-e-ashnai ka

jalata kyun hai ai dil mujh ko shauq-e-wasl bhaDka kar

are is aag se tu phunk de parda judai ka

ilahi kaun se mujrim ki aamad hai qiyamat mein

hua hai hukm ke ko ye kis ki peshwai ka

hadaf dil ko banate hain jo kuchh kahiye to kahte hain

sikhate hain chalan tiron ko apne dilrubai ka

pahunch kar yar tak be-KHud hue pahunche na matlab ko

rasai ne diya kya dagh hum ko na-rasai ka

qadam tera jahn paDta hai bu mehndi ki aati hai

tere naqsh-e-qadam mein rang hai pa-e-hinai ka

shab-e-waslat nazakat un ki shauq-e-wasl se boli

taras kha mujh pe zalim waqt hai be-dast-o-pai ka

wafa manzur us ko bhi nahin hai us ki furqat mein

sabaq paDhne chali hai umr us se bewafai ka

tumhin tum aaina-KHane mein ho chaaron taraf dekho

kaho ji ab bhi kuchh arman nikla KHud-numai ka

palaT kar saikDon kali balaen bose leti hain

inhin baaton se munh kala hai shabha-e-judai ka

sar us ke panw par rakhiye banae hain ye but jis ne

maza hai KHak patthar pae but par jabha-sai ka

bahut hi bhar gaya hai umr ka paimana ab chhalka

charagh ek jhilmilata sa hai bazm-e-ashnai ka

qafas mein hun magar sara chaman aankhon ke aage hai

rihai ke barabar ab tasawwur se rihai ka

nahin mumkin hai sona hijr mein nind aa nahin sakti

tila ye phir raha hai aankh mein tauq-e-tilai ka

amir-e-kHasta-jaan aafat mein hai ya haidar-e-safdar

karo imdad is ki waqt hai mushkil-kushai ka