lahraati hai jab zulf-e-jaanan baadal ko pasina aata hai

lahrātī hai jab zulf-e-jānāñ bādal ko pasīna aatā hai

mā'lūm ye hotā hai jaise sāvan kā mahīna aatā hai

āġhosh-e-hayāt-o-maut meñ vo sotā hai kabhī uThtā hai kabhī

bīmār-e-mohabbat ko tere mar-mar ke jiinā aatā hai

kyā kaam surāhī sāġhar se mastī se ġharaz rahtī hai use

jo dekhte terī āñkhoñ ko piine kā qarīna aatā hai

vo dekho lab-e-sāhil aa.e altāf-o-karam kī hogī nazar

ai Dūbne vaalo ġham na karo sāhil pe safīna aatā hai

is ruḳh se zulf meñ haTte hī dam toḌtī haiñ kaalī rāteñ

jab chāñd nikaltā hai 'nāzāñ' tāroñ ko pasīna aatā hai

lahraati hai jab zulf-e-jaanan baadal ko pasina aata hai

ma'lum ye hota hai jaise sawan ka mahina aata hai

aaghosh-e-hayat-o-maut mein wo sota hai kabhi uThta hai kabhi

bimar-e-mohabbat ko tere mar-mar ke jina aata hai

kya kaam surahi saghar se masti se gharaz rahti hai use

jo dekhte teri aankhon ko pine ka qarina aata hai

wo dekho lab-e-sahil aae altaf-o-karam ki hogi nazar

ai Dubne walo gham na karo sahil pe safina aata hai

is ruKH se zulf mein haTte hi dam toDti hain kali raaten

jab chand nikalta hai 'nazan' taron ko pasina aata hai