نوک مژۂ یار ہے نشتر کے برابر

نوک مژۂ یار ہے نشتر کے برابر

خوں ریزی میں ابرو بھی ہے خنجر کے برابر

ہر چند گلستاں میں گل اندام بہت ہیں

خوش قد نہیں کوئی سرو و صنوبر کے برابر

کیا آب ہے کیا تاب ہے اے جوہری آ دیکھ

آنسو ہیں مرے لعل و گوہر کے برابر

مر مر گئے عشاق کسی سے نہ ہوا نرم

خوبوں کا دل سخت ہے پتھر کے برابر

دل اس میں جو پھنس جائے تو جیتے نہ چھوٹے ہائے

کوئی جال نہیں زلف معنبر کے برابر

عشاق گلی میں تری کیوں خاک نہ چھانے

ہے خاک ترے در کی انہیں زر کے برابر

کیا شور قیامت ہو عجب فتنہ ہو برپا

جب یار کھڑا ہو مرے بستر کے برابر

وہ صاحب لولاک ہے اور ختم رسالت

ہرگز نہیں کوئی مرے پیمبر کے برابر

آزاد مشائخ میں ترابؔ ایک نہ دیکھا

کوئی اہل ملامت ہو قلندر کے برابر