parwane kyun na KHak hon jal kar charagh mein

parvāne kyuuñ na ḳhaak hoñ jal kar charāġh meñ

jalva usī ke nuur kā hai har charāġh meñ

qāsid kā sar hai mahfil-e-jānāñ meñ mīr-e-farsh

roġhan kī jā hai ḳhūn-e-kabūtar charāġh meñ

laale meñ tum ho gul meñ ho tum mehr-o-mah meñ tum

jalva tumhāre chehre kā hai har charāġh meñ

āshiq haiñ gosha-gīr nahīñ kūcha-gard ham

parvāne jalte phirte haiñ ghar ghar charāġh meñ

kāmil jo ishq meñ hai use soz se hai saaz

parvāna-sāñ jale na samandar charāġh meñ

zaa.il shabāb ho to kahāñ husn meñ namak

roġhan na ho to nuur ho kyuuñ kar charāġh meñ

hai jalva-gāh-e-yār chaman ho ki bazm ho

har phuul meñ vo bū hai ziyā har charāġh meñ

parvāne aise nashsha-e-ulfat se haiñ jo mast

kyā mai bharī hai sūrat-e-sāġhar charāġh meñ

dil āshiqoñ ke kyuuñ na ho qurbān-e-rū-e-yār

parvāne jal rahe haiñ barābar charāġh meñ

hañsne meñ us ke dāñtoñ kā partav agar paḌe

ho har fatīla rishta-e-gauhar charāġh meñ

parwane kyun na KHak hon jal kar charagh mein

jalwa usi ke nur ka hai har charagh mein

qasid ka sar hai mahfil-e-jaanan mein mir-e-farsh

roghan ki ja hai KHun-e-kabutar charagh mein

lale mein tum ho gul mein ho tum mehr-o-mah mein tum

jalwa tumhaare chehre ka hai har charagh mein

aashiq hain gosha-gir nahin kucha-gard hum

parwane jalte phirte hain ghar ghar charagh mein

kaamil jo ishq mein hai use soz se hai saz

parwana-san jale na samandar charagh mein

zail shabab ho to kahan husn mein namak

roghan na ho to nur ho kyun kar charagh mein

hai jalwa-gah-e-yar chaman ho ki bazm ho

har phul mein wo bu hai ziya har charagh mein

parwane aise nashsha-e-ulfat se hain jo mast

kya mai bhari hai surat-e-saghar charagh mein

dil aashiqon ke kyun na ho qurban-e-ru-e-yar

parwane jal rahe hain barabar charagh mein

hansne mein us ke danton ka partaw agar paDe

ho har fatila rishta-e-gauhar charagh mein