ek qiyamat ban gai hai aashnai aap ki

ik qiyāmat ban ga.ī hai āshnā.ī aap kī

ḳhuun ke aañsū rulātī hai judā.ī aap kī

dar haqīqat aap haiñ vo paikar-e-husn-o-jamāl

jaan se dil se huī shaidā ḳhudā.ī aap kī

dekhte hī dekhte uḌne lage hazrat ke hosh

ham ne jab tasvīr nāseh ko dikhā.ī aap kī

sair karne un ke kūche meñ ga.e the ek din

kuchh ḳhabar ai hazrat dil phir na aa.ī aap kī

aur is be-chārgī kā ho bhī saktā kyā ilaaj

ro diye ham dekh kar be-e'tinā.ī aap kī

zo.af meñ chalnā to kyā uThnā bhī thā apnā muhāl

vo to bas ham ko mohabbat khīñch laa.ī aap kī

faiz paatā hai 'nasīr' is sañg dar se ik jahāñ

kyuuñ rahe nākām āḳhir jabha-sā.ī aap kī

ek qiyamat ban gai hai aashnai aap ki

KHun ke aansu rulati hai judai aap ki

dar haqiqat aap hain wo paikar-e-husn-o-jamal

jaan se dil se hui shaida KHudai aap ki

dekhte hi dekhte uDne lage hazrat ke hosh

hum ne jab taswir naseh ko dikhai aap ki

sair karne un ke kuche mein gae the ek din

kuchh KHabar ai hazrat dil phir na aai aap ki

aur is be-chaargi ka ho bhi sakta kya ilaj

ro diye hum dekh kar be-e'tinai aap ki

zoaf mein chalna to kya uThna bhi tha apna muhaal

wo to bas hum ko mohabbat khinch lai aap ki

faiz pata hai 'nasir' is sang dar se ek jahan

kyun rahe nakaam aaKHir jabha-sai aap ki