jab dil-e-mansur par haq chha gaya

jab dil-e-mansūr par haq chhā gayā

lab pe iqrār-e-anal-haq aa gayā

yaaro tum kahte ho jis ko arsh par

maiñ to apne dil meñ us ko pā gayā

kaun dekhe us ko ġhair az ahl-e-dil

āftāb andhe se kab dekhā gayā

haif sirr-e-haq na pūchhā ek ne

paas apne ik jahāñ aayā gayā

dam-ba-ḳhud ho rahiye kuchh kahiye na ab

haq jo koī bolā so jhaT maarā gayā

murshid-e-bar-haq ke sadqe jā.iye

raah haq kī jo hameñ dikhlā gayā

kah de tālib se ki sab haq hai 'turāb'

kalimat-ul-haq vo yahī farmā gayā

jab dil-e-mansur par haq chha gaya

lab pe iqrar-e-anal-haq aa gaya

yaro tum kahte ho jis ko arsh par

main to apne dil mein us ko pa gaya

kaun dekhe us ko ghair az ahl-e-dil

aaftab andhe se kab dekha gaya

haif sirr-e-haq na puchha ek ne

pas apne ek jahan aaya gaya

dam-ba-KHud ho rahiye kuchh kahiye na ab

haq jo koi bola so jhaT mara gaya

murshid-e-bar-haq ke sadqe jaiye

rah haq ki jo hamein dikhla gaya

kah de talib se ki sab haq hai 'turab'

kalimat-ul-haq wo yahi farma gaya