شیخ جی تشریف یوں بہر زیارت لے چلے

شیخ جی تشریف یوں بہر زیارت لے چلے

لب پہ توبہ ان بتوں کی دل میں الفت لے چلے

لائے تھے ملک عدم سے ساتھ اپنے نقد دل

اب یہاں سے اس کے بدلے داغ فرقت لے چلے

ضعف کافی ہے مجھے صحرا نوردی میں جنوں

کون اپنے سر سے بار تاب و طاقت لے چلے

دین و ایماں نذر دے کے محفل جاناں سے ہم

دل کے دل ہی میں رہے ارماں یہ حسرت لے چلے

قتل کچھ عاشق ہوئے مقتل میں اس کے ہاتھ سے

کچھ پھرے مایوس اور شوق شہادت لے چلے

کچھ مزہ تنہائی میں صحرا نوردی کا نہیں

ہاں چلوں گر ساتھ اپنے جوش وحشت لے چلے

نکلا مے خانہ سے جب اوگھٹؔ تو پوچھا شاہ جیؔ

یہ بغل میں کیا دبائے آپ حضرت لے چلے