yanh pir-e-mai-KHana hazrat hamin hain

yañh pīr-e-mai-ḳhāna hazrat hamīñ haiñ

salāmat haiñ ahl-e-malāmat hamīñ haiñ

amīn-e-sujūd-e-mohabbat hamīñ haiñ

tirī bandagī kī haqīqat hamīñ haiñ

larazte hue kohsāroñ ke aage

uThā leñ jo bār-e-amānat hamīñ haiñ

dil-e-zinda har qabr tan se uThegā

jo nazdīk hai vo qiyāmat hamīñ haiñ

idhar dekh haq ko agar dekhnā hai

ḳhudā-e-mohabbat kī sūrat hamīñ haiñ

tire kufr-o-īmāñ se kyā kaam ham ko

baharhāl rahmat hī rahmat hamīñ haiñ

mohabbat kisī ne kisī se bhī kī ho

magar us mohabbat kī ġhāyat hamīñ haiñ

mohabbat ḳhudā lā-sharīk-lahu hai

mohabbat mohabbat mohabbat hamīñ haiñ

yanh pir-e-mai-KHana hazrat hamin hain

salamat hain ahl-e-malamat hamin hain

amin-e-sujud-e-mohabbat hamin hain

teri bandagi ki haqiqat hamin hain

larazte hue kohsaron ke aage

uTha len jo bar-e-amanat hamin hain

dil-e-zinda har qabr tan se uThega

jo nazdik hai wo qiyamat hamin hain

idhar dekh haq ko agar dekhna hai

KHuda-e-mohabbat ki surat hamin hain

tere kufr-o-iman se kya kaam hum ko

baharhaal rahmat hi rahmat hamin hain

mohabbat kisi ne kisi se bhi ki ho

magar us mohabbat ki ghayat hamin hain

mohabbat KHuda la-sharik-lahu hai

mohabbat mohabbat mohabbat hamin hain