jo bahaar aai mere gulshan-e-jaan se aai

jo bahār aa.ī mere gulshan-e-jāñ se aa.ī

ḳhaak ke Dher meñ ye baat kahāñ se aa.ī

vo nazar hai jo musharraf hai ruḳh-e-sāqī se

vo ḳhabar hai jo dar-e-pīr-e-muġhāñ se aa.ī

ishq manzil pe faqat rāh-e-yaqīñ se pahuñchā

aql nākām rahī vahm-o-gumāñ se aa.ī

ishq-e-ġham aur ḳhushī ek samajh baiThā hai

tere hañsne kī jo āvāz fuġhāñ se aa.ī

rañg-o-bū husn-o-javānī meñ hai a.alam sarshār

tere aane kī ḳhabar kaun-o-makāñ se aa.ī

ḳhaak huuñ paak huuñ adnā bhī huuñ a.alā bhī 'zahīn'

ḳhud pahuñch jā.egī jo chiiz jahāñ se aa.ī

jo bahaar aai mere gulshan-e-jaan se aai

KHak ke Dher mein ye baat kahan se aai

wo nazar hai jo musharraf hai ruKH-e-saqi se

wo KHabar hai jo dar-e-pir-e-mughan se aai

ishq manzil pe faqat rah-e-yaqin se pahuncha

aql nakaam rahi wahm-o-guman se aai

ishq-e-gham aur KHushi ek samajh baiTha hai

tere hansne ki jo aawaz fughan se aai

rang-o-bu husn-o-jawani mein hai aalam sarshaar

tere aane ki KHabar kaun-o-makan se aai

KHak hun pak hun adna bhi hun aala bhi 'zahin'

KHud pahunch jaegi jo chiz jahan se aai