dil ki har dhaDkan payam-e-dost ho jati hai kya

dil kī har dhaḌkan payām-e-dost ho jaatī hai kyā

guftugū apnī kalām-e-dost ho jaatī hai kyā

pūchhtā huuñ laġhzish-e-mastāna-e-arbāb-e-ishq

ā.īna-dār khirām-e-dost ho jaatī hai kyā

miT ga.ī hastī agar nām-o-nishān dost par

ḳhud nishān-e-dost nām-e-dost ho jaatī hai kyā

sūrat-e-hastī fanā ho kar baqā-e-dost meñ

ma.anī-e-naqsh-e-davām dost ho jaatī hai kyā

afzal-ul-makHlūq masjūd-e-malā.ik ke liye

ādamiyat ehtirām dost ho jaatī hai kyā

har nafas rāh-e-razā-e-dost meñ ho kar fanā

zindagī qā.im-maqām-e-dost ho jaatī hai kyā

ishq meñ tan aur man sab ek aate haiñ nazar

dil kī duniyā saqf-o-bām-e-dost ho jaatī hai kyā

ruuh amar-e-rab hai amar-e-rab hai kun kun hai kalām

rūh-e-insānī kalām-e-dost ho jaatī hai kyā

dil ki har dhaDkan payam-e-dost ho jati hai kya

guftugu apni kalam-e-dost ho jati hai kya

puchhta hun laghzish-e-mastana-e-arbab-e-ishq

aaina-dar khiram-e-dost ho jati hai kya

miT gai hasti agar nam-o-nishan dost par

ḳhud nishan-e-dost nam-e-dost ho jati hai kya

surat-e-hasti fana ho kar baqa-e-dost mein

mani-e-naqsh-e-dawam dost ho jati hai kya

afzal-ul-makHluq masjud-e-malaik ke liye

aadamiyat ehtiram dost ho jati hai kya

har nafas rah-e-raza-e-dost mein ho kar fana

zindagi qaim-maqam-e-dost ho jati hai kya

ishq mein tan aur man sab ek aate hain nazar

dil ki duniya saqf-o-baam-e-dost ho jati hai kya

ruh amar-e-rab hai amar-e-rab hai kun kun hai kalam

ruh-e-insani kalam-e-dost ho jati hai kya