kasrat-e-husn mein bhi aalam-e-tanhai hai

kasrat-e-husn meñ bhī a.alam-e-tanhā.ī hai

saikḌoñ jalve haiñ har jalve meñ yaktā.ī hai

be-hijābī nigah-e-shauq kī rusvā.ī hai

jab hijābāt meñ bhī chashm-e-tamāshā.ī hai

ai junūñ kaun sā a.alam hai ye allāh allāh

ishq maġhrūr hai aur husn tamannā.ī hai

shart hai vāqif-e-ādāb-e-tamāsha honā

varna har jalva yahāñ jalva-e-sīnā.ī hai

saiqal-e-sajda se ā.īna hai sañg-e-dar-e-yār

apnī sūrat nazar us ā.īne meñ aa.ī hai

qissa-e-sarmad-o-mansūr kā hāsil hai yahī

ki ḳhatā ishq meñ kHāmoshī-o-goyā.ī hai

ai 'zahīn' ab na vo sozish na tapish hai na ḳhalish

dil-e-afsurda charāġh-e-shab-e-tanhā.ī hai

kasrat-e-husn mein bhi aalam-e-tanhai hai

saikDon jalwe hain har jalwe mein yaktai hai

be-hijabi nigah-e-shauq ki ruswai hai

jab hijabaat mein bhi chashm-e-tamashai hai

ai junun kaun sa aalam hai ye allah allah

ishq maghrur hai aur husn tamannai hai

shart hai waqif-e-adab-e-tamasha hona

warna har jalwa yahan jalwa-e-sinai hai

saiqal-e-sajda se aaina hai sang-e-dar-e-yar

apni surat nazar us aaine mein aai hai

qissa-e-sarmad-o-mansur ka hasil hai yahi

ki KHata ishq mein kHamoshi-o-goyai hai

ai 'zahin' ab na wo sozish na tapish hai na KHalish

dil-e-afsurda charagh-e-shab-e-tanhai hai