یا نبی ہند میں ہم ٹھوکریں کھائیں کب تک

یا نبی ہند میں ہم ٹھوکریں کھائیں کب تک

دیکھیے آپ مدینے میں بلائیں کب تک

آنکھیں پتھرا گئیں اب راہ بہت دیکھ چکے

سختیاں درد جدائی کی اٹھائیں کب تک

پھر کے آتے ہیں جو زائر ہمیں کرتے ہیں خجل

بات بگڑی ہوئی لوگوں سے بنائیں کب تک

صاف مطلع ہو دکھاؤ ہمیں امید کا دن

گہری گہری شب غم کی یہ گھٹائیں کب تک

اشک غم رک نہیں سکتا ہے کہاں تک روکیں

درد دل چھپ نہیں سکتا ہے چھپائیں کب تک

نہیں ملتی ہمیں دنیا کے بکھیڑوں سے نجات

یا نبی گرد رہیں گی یہ بلائیں کب تک

کیجیے وعدہ بلانے کا کہ اب تاب نہیں

کہئے بدلیں گی مخالف یہ ہوائیں کب تک

چل زیارت کو بہانے نہیں اچھے ہیں امیرؔ

جمع کر دل کو پریشان یہ رائیں کب تک