ہر شئے میں دیکھتا ہے جلوہ ابوالعلا کا

ہر شئے میں دیکھتا ہے جلوہ ابوالعلا کا

رکھتا ہے اور آنکھیں شیدا ابوالعلا کا

کس ملک میں نہیں ہے چرچا ابوالعلا کا

پہونچا ہے شش جہت میں شہرہ ابوالعلا کا

میلے میں لطف دیکھا تنہائی کا اسی جا

خلوت ہے انجمن میں کوچہ ابوالعلا کا

اس کے سوا پھر اس کو کچھ بھی نظر نہ آیا

جس آنکھ میں سمایا روضہ ابوالعلا کا

ہے انتہا سے بڑھ کر جوش و خروش اپنا

اس دل میں موجزن ہے دریا ابوالعلا کا

کیوں کر کوئی سماے اپنی نظر میں یارو

ان آنکھوں نے ہے دیکھا جلوہ ابوالعلا کا

پوچھا جمال حق کا مرشد سے میں نے حلیہ

فرمایا دیکھ لو تم نقشہ ابوالعلا کا

جب آنکھیں بند کر کے دیکھا اسی کو پایا

سینے میں دل بنا ہے روضہ ابوالعلا کا

اکبرؔ میں آپ اپنی آنکھوں کا شیفتہ ہوں

دیکھا ہے میں نے ان سے روضہ ابوالعلا کا