حق رسا حق آشنا رشک_جہاں امجھر میں ہے

حق رسا حق آشنا رشک جہاں امجھر میں ہے

وارث علم شہ کون و مکاں امجھر میں ہے

جس کی نکہت سے مشام سنیت ہے عطر بیز

وہ سیادت کا گل عنبر فشاں امجھر میں ہے

آؤ دیکھو رہروان راہ عرفان و سلوک

حضرتِ غوث الوریٰ کا اک نشاں امجھر میں ہے

ہر طرف اترا ہوا ہے خوشبؤوں کا قافلہ

روح پرور دل نشیں دل کش سماں امجھر میں ہے

واقف کرب درون مفلس و مفلوک حال

چارہ ساز و حامیان بے اماں امجھر میں ہے

ساٸلین دہر کا ہے جس جگہ جم غفیر

معدن لطف و عطا وہ آستاں امجھر میں ہے

جس کے اک نکتے میں ہے آباد حکمت کا جہاں

وہ علوم و فضل کا کوہ گراں امجھر میں ہے

ناشر پیغام محبوب خدائے لم یزل

عامل فرمان شاہ مرسلاں امجھر میں ہے

کانپ اٹھتا ہے یہ سن کر حزب اعدا کا وجود

بہر گستاخ نبی تیر و سناں امجھر میں ہے

جن کو کہتا ہے جہاں واصفؔ محمد قادری

خاک کے نیچے وہ رشک آسماں امجھر میں ہے