دل_مایوس کو دیتا ہے سہارا داتا

دل مایوس کو دیتا ہے سہارا داتا

ایسا داتا ہے حقیقت میں ہمارا داتا

کی مدد حق نے اسے جب بھی پکارا داتا

تیری تعلیم کا صدقہ ہے یہ سارا داتا

عین ممکن ہے کہ اللہ مجھے بخش ہی دے

قبر سے لے کے اٹھوں نام تمہارا داتا

ایک دن منزل توحید پہ پہنچائے گا

اس تری نسبت عالی کا سہارا داتا

آج انوار محمد سے فضا ہے جگ مگ

اللہ اللہ یہ پر نور نظارا داتا

غم دنیا کے جھمیلوں سے نکل جاؤں ابھی

مجھ کو کافی ہے ترا ایک اشارہ داتا

ہے شب و روز تصور میں زیارت حاصل

سامنے ہے مرے دربار تمہارا داتا

شہر لاہور پہ کیوں بارش انوار نہ ہو

جلوہ گر ہے حسنی راج دلارا داتا

میرے ہونٹوں پہ اگر نام تمہارا آ جائے

لینے آئے مجھے طوفاں میں کنارا داتا

غوث اعظم کے حوالے سے نصیرؔ آیا ہے

اک نظر اس پہ بھی ہو جائے خدا را داتا