رسول‌_اللہؐ کے رخ کے برابر ہو نہیں سکتا

رسول‌ اللہؐ کے رخ کے برابر ہو نہیں سکتا

وہ چمکے لاکھ پر اتنا منور ہو نہیں سکتا

وہاں خوشبو ہے پھولوں کی یہاں حضرت کی عطریت

ارم کا باغ طیبہ کے برابر ہو نہیں سکتا

کہا جو آپ نے خالق نے وہ منظور فرمایا

کوئی محبوب حق حضرت سے بڑھ کر ہو نہیں سکتا

نہ دیکھی صورت حقی کسی نے غیر حق تیری

کوئی تجھ سا حسیں اللہ اکبر ہو نہیں سکتا

جمال حضرت حق آپ نے بے پردہ دیکھا ہے

کسی کو قرب خاص ایسا میسر ہو نہیں سکتا

مدینہ کی زمیں کو عرش اعظم پر فضیلت ہے

چلوں سر سے نہ یاں اے جان مضطر ہو نہیں سکتا

کہوں کیا آب جاں بخش مدینہ کی حلاوت میں

لطیف ایسا تو ہرگز آب کوثر ہو نہیں سکتا

نگاہوں میں ہے اب تک پردۂ قصر نبی اکبرؔ

یہ جلوہ حشر تک آنکھوں سے باہر ہو نہیں سکتا