hua phir shia-o-sunni mein jhagDa

huā phir shī.a-o-sunnī meñ jhagḌā

zamīñ se charḳh tak pahuñchā qaziya

ye donoñ kalma-go haiñ vāh-vāh

ḳhudā dikhlā.e in ko diiñ kī raah

huā dañgā ye shahar lucknow meñ

na aa.e farq kyuuñ kar aabrū meñ

musalmāñ donoñ phir bāham nifāq aah

kidhar DhūñDheñ tujhe ai ittifāq aah

hamārī ḳhūbī-e-taqdīr dekho

chalī aapas meñ hī shamshīr dekho

jo mil-jul kar ye donoñ bhaa.ī rahte

na ham is tarah kī īzā.eñ dete

hamārā un kā qibla ek diiñ ek

makāñ donoñ kā vāhid hai makīñ ek

ḳhudā hai ek donoñ kā rasūl ek

to hai be-shubah phir asal-al-usūl ek

hamārī aur un kī hai kitāb ek

savāl qabr vāhid hai javāb ek

phir us par kis qayāmat kā hai kiina

bane haiñ donoñ sañg-o-ābgīna

hamīñ laḌ-bhiḌ ke jab ho jā.eñge chuur

to dushman hogā ham par kyuuñ na mansūr

ḳhudāyā donoñ ke dil saaf kar de

adāvat kī jagah ulfat ko bhar de

hamārī un kī hālat ek ho jaa.e

hamārī un kī niyyat ek ho jaa.e

kaheñ āmīn dil se donoñ bhaa.ī

bahamdillāh ki hotī hai safā.ī

hua phir shia-o-sunni mein jhagDa

zamin se charKH tak pahuncha qaziya

ye donon kalma-go hain wah-wah

KHuda dikhlae in ko din ki rah

hua danga ye shahar lucknow mein

na aae farq kyun kar aabru mein

musalman donon phir baham nifaq aah

kidhar DhunDhen tujhe ai ittifaq aah

hamari KHubi-e-taqdir dekho

chali aapas mein hi shamshir dekho

jo mil-jul kar ye donon bhai rahte

na hum is tarah ki izaen dete

hamara un ka qibla ek din ek

makan donon ka wahid hai makin ek

KHuda hai ek donon ka rasul ek

to hai be-shubah phir asal-al-usul ek

hamari aur un ki hai kitab ek

sawal qabr wahid hai jawab ek

phir us par kis qayamat ka hai kina

bane hain donon sang-o-abgina

hamin laD-bhiD ke jab ho jaenge chur

to dushman hoga hum par kyun na mansur

KHudaya donon ke dil saf kar de

adawat ki jagah ulfat ko bhar de

hamari un ki haalat ek ho jae

hamari un ki niyyat ek ho jae

kahen aamin dil se donon bhai

bahamdillah ki hoti hai safai