اے دل مدام بندۂ آں شہریار باش

اے دل ہمیشہ کے لیے اس شہریار (سردار) کا غلام بن جا اور کج مدار فلک کی گردش کے غم (غمِ دنیا) سے چھٹکارا حاصل کر لے۔

دوست کے حکم کے سامنے گردنِ تسلیم کبھی مت اٹھا اور پہاڑوں کی طرح رضا و تسلیم کے طریق میں ثابت قدم ہو جا۔

سوز عشق کے بغیر زندگی ایک بے فروغ شمع ہے، پروانہ وار محبت شعار مردوں کی طرح بن جا۔

اپنی پیشانی کے خط کو اس کے در کی خاک سے سجائے رکھ اور روزگار کا ہمدم بن جا اور قسمت کا دھنی ہو جا۔

دل کو گیسوئے جاناں کا قیدی بنا لے اور دنیا کے رسم و رواج کی قید سے آزاد ہو جا۔

دوست کے عشق سے امید کا رشتہ منقطع مت کر، اور غمِ روزگار کے ہجوم سے آسودہ ہو جا۔

اے دل اب جب کہ تُو نے امانت کا بوجھ اٹھا ہی لیا ہے تو اپنی جان پر محنت اٹھا اور بردبار بن جا۔

اس کی راہ میں سر فدا کر دے، اور اس کے رخ پر دل نثار، جگر سے خون ٹپکانے اور آنکھوں سے آنسو بہانے والا بن جا۔

نصیرؔ چونکہ ساقیٔ کوثر کا دُرد نوش (تہہِ جام و تلچھٹ پینے والا) ہے لہذا کردگار کے بادۂ کرم سے سرشار ہے۔