سرو خراماں سرمست راہی

سرو خراماں سرمست راہی

ہر نقشِ پا قابلِ سجدہ گاہی

نازک خرامی جادو نگاہی

قدموں پہ اُن کے قربان شاہی

وسعتِ داماں ظلِ الٰہی

آغوشِ رحمت عالم پناہی

عشوہ گرہ ہے یا کہ قیامت

رقصاں ہے عالم توبہ الٰہی

قسمت ہے اچھی سودا ہے اچھا

ان کی ادائیں میری تباہی

برہم نظر سے آفاق برہم

ساکن ہے انجم سوزاں ہے ماہی

مجھ میں سمایا ہے تو حرف جیسے

ظاہر ہے صورت باطن سیاہی

محشر میں ہوگی سامنے اُن کے

عذرِ محبت ہر عذر خواہی

ترچھی نگاہیں چلمن میں غمزے

بھاتی نظامیؔ کو ہے کج کلاہی