jab mera zauq-e-nazar husn-azma ho jaega

jab mirā zauq-e-nazar husn-āzmā ho jā.egā

lākhoñ pardoñ se bhī vo jalva-numā ho jā.egā

ye nikamma-pan jumūd-e-dil kā ik anjām hai

dil se koī kaam le dil kaam kā ho jā.egā

barahman aur shaiḳh meñ hai muddatoñ se guftugū

tum kahīñ jalva dikhā do faisla ho jā.egā

safha-e-tārīḳh par kaam aa.egā merā lahū

kam se kam rañgīn unvān-e-vafā ho jā.egā

maslahat ye hai ḳhudī kī ġhaflateñ taarī raheñ

jab ḳhudī miT jā.egī banda ḳhudā ho jā.egā

tālib-e-kul ho ke fautul-kul kī mahrūmī na le

ek kā ho jā to phir sab kuchh tirā ho jā.egā

zindagī do din kī hai lambī sahī mī.ād-e-qaid

aaj aayā hai qafas meñ kal rihā ho jā.egā

so ke uThnā bhī hai ai 'sīmāb' duniyā meñ muhāl

mar ke jī uThnā mirā ik mo.ajiza ho jā.egā

jab mera zauq-e-nazar husn-azma ho jaega

lakhon pardon se bhi wo jalwa-numa ho jaega

ye nikamma-pan jumud-e-dil ka ek anjam hai

dil se koi kaam le dil kaam ka ho jaega

barahman aur shaiKH mein hai muddaton se guftugu

tum kahin jalwa dikha do faisla ho jaega

safha-e-tariKH par kaam aaega mera lahu

kam se kam rangin unwan-e-wafa ho jaega

maslahat ye hai KHudi ki ghaflaten tari rahen

jab KHudi miT jaegi banda KHuda ho jaega

talib-e-kul ho ke fautul-kul ki mahrumi na le

ek ka ho ja to phir sab kuchh tera ho jaega

zindagi do din ki hai lambi sahi miad-e-qaid

aaj aaya hai qafas mein kal riha ho jaega

so ke uThna bhi hai ai 'simab' duniya mein muhaal

mar ke ji uThna mera ek moajiza ho jaega