meri fitrat wafa hai de raha hun imtihan phir bhi

mirī fitrat vafā hai de rahā huuñ imtihāñ phir bhī

vo fitrat-āshnā hai aur mujh se bad-gumāñ phir bhī

chhupātā huuñ magar chhuptā nahīñ dard-e-nihāñ phir bhī

nigāh-e-yās ho jaatī hai dil kī tarjumāñ phir bhī

ġham-e-vāmāndagī se be-niyāz-e-hosh baiThā huuñ

chalī aatī hai āvāz-e-darā-e-kārvāñ phir bhī

vo mere sar ko Thukrāte haiñ sajdoñ se ḳhafā ho kar

jabīñ se merī paivasta hai un kā āstāñ phir bhī

kalīsā aur ka.aba naam ko do jalva-gāheñ haiñ

magar yak-rañg hai zauq-e-jabīn-o-āstāñ phir bhī

vafā ik lazzat-e-pur-kaif hai ik āyat-e-taskīñ

vafā kā naam lene se laraztī hai zabāñ phir bhī

hijāb-andar-hijāb amvāj-e-tūfān-e-tajallī haiñ

faroġh-e-sham.a se parvāna hai ātish-ba-jāñ phir bhī

ishāroñ se nigāhoñ se bahut kuchh man.a kartā huuñ

qafas hī par jhukī paḌtī hai shāḳh-e-āshiyāñ phir bhī

bahut dilchasp hai 'sīmāb' shām-e-vādī-e-ġhurbat

vatan kī sub.h meñ kuchh aur thiiñ rañgīniyāñ phir bhī

meri fitrat wafa hai de raha hun imtihan phir bhi

wo fitrat-ashna hai aur mujh se bad-guman phir bhi

chhupata hun magar chhupta nahin dard-e-nihan phir bhi

nigah-e-yas ho jati hai dil ki tarjuman phir bhi

gham-e-wamandagi se be-niyaz-e-hosh baiTha hun

chali aati hai aawaz-e-dara-e-karwan phir bhi

wo mere sar ko Thukraate hain sajdon se KHafa ho kar

jabin se meri paiwasta hai un ka aastan phir bhi

kalisa aur kaba nam ko do jalwa-gahen hain

magar yak-rang hai zauq-e-jabin-o-astan phir bhi

wafa ek lazzat-e-pur-kaif hai ek aayat-e-taskin

wafa ka nam lene se larazti hai zaban phir bhi

hijab-andar-hijab amwaj-e-tufan-e-tajalli hain

farogh-e-shama se parwana hai aatish-ba-jaan phir bhi

ishaaron se nigahon se bahut kuchh mana karta hun

qafas hi par jhuki paDti hai shaKH-e-ashiyan phir bhi

bahut dilchasp hai 'simab' sham-e-wadi-e-ghurbat

watan ki subh mein kuchh aur thin ranginiyan phir bhi