mohabbat hi fana ke baad bhi ba-ru-e-kar aai

mohabbat hī fanā ke ba.ad bhī ba-rū-e-kār aa.ī

na mujh ko diiñ raas aayā na duniyā sāz-gār aa.ī

mere nākām hote hī vafā ba-rū-e-kār aa.ī

harīm-e-husn se āḳhir naved-e-e'tibār aa.ī

pareshāñ ho gayā mahshar pareshāñ dekh kar mujh ko

yahāñ bhī kaam mirī ḳhātir āshufta-kār aa.ī

vidā.a-e-gardish-e-ayyām thā tark-e-chaman merā

na phir shām-e-ḳhizāñ aa.ī na phir sub.h-e-bahār aa.ī

junūñ ne ḳhair-maqdam kar ke rakh lī sharm-e-rusvā.ī

abhī jannat se nikle the ki tirī rahguzār aa.ī

ye hasrat thī ki dāġh-e-dil kī lau jaldī bhaḌak uThī

ye qismat thī ki ab ke der meñ fasl-e-bahār aa.ī

do rose ik shaan se 'sīmāb' masrūf-e-tajallī haiñ

samajh meñ aaj vaj.h-e-inqalāb-e-rozgār aa.ī

mohabbat hi fana ke baad bhi ba-ru-e-kar aai

na mujh ko din ras aaya na duniya saz-gar aai

mere nakaam hote hi wafa ba-ru-e-kar aai

harim-e-husn se aaKHir nawed-e-e'tibar aai

pareshan ho gaya mahshar pareshan dekh kar mujh ko

yahan bhi kaam meri KHatir aashufta-kar aai

widaa-e-gardish-e-ayyam tha tark-e-chaman mera

na phir sham-e-KHizan aai na phir subh-e-bahaar aai

junun ne KHair-maqdam kar ke rakh li sharm-e-ruswai

abhi jannat se nikle the ki teri rahguzar aai

ye hasrat thi ki dagh-e-dil ki lau jaldi bhaDak uThi

ye qismat thi ki ab ke der mein fasl-e-bahaar aai

do rose ek shan se 'simab' masruf-e-tajalli hain

samajh mein aaj wajh-e-inqalab-e-rozgar aai